Roger Andersson og Simon Feng vart kretsmeistrar då årets kretsmeisterskap for Hordaland vart arrangert i Fyllingsdalen idrettshall i Bergen laurdag! Dei gjekk til topps i herrar dobbel etter å ha slått Gard og Brian Egenberg frå Heros 3-0 i finalen. I semien møtte dei tøffare motstand, men vann til slutt 3-2 mot Anders Hovden/Petter Vedeler frå Laksevåg.
Roger gjekk som vanleg også til topps i herrar open. Der vart klubbkamerat Thomas Låte nummer to, medan Jan Roger Andersson vart nummer fem. Simon var svært nære å gå vidare frå puljespelet, då han tapte 11-9 i femte og avgjerande sett mot langt høgare rangerte Morten Bendiksen frå Bergen HIL.
Piotr Kostrzewski fekk ein sterk andreplass i herrar f. I finalen tapte han 3-2 mot Vincent Ngyen frå Fjell – ein spelar han tidlegare på dagen slo i puljespelet. Ivo Beijersbergen sikra seg ein flott bronse i den same klassen etter å ha tapt svært knepent mot Ngyen i semien. Dottera Malin Beijersbergen vart nummer tre i jenter 13.
Hardanger BTK er svært godt nøgde med resultat og innsats i helga. Neste turnering er Stiga Norges Cup i Bergen 18.-19. november.