Hardanger BTK stilte laurdag med tre deltakarar i Laksevågkruset i Alvøen idrettshall i Bergen. Best gjekk det med Murad Basem Farah. Han sikra seg ein flott tredjeplass i herrar F! I herrar E vart Mohamad Basem Farah nummer ni.

Alle resultat finn du her: https://bordtennislive.no/events/69/0/0/1/1

Neste turnering er Norheimsund Open, som me arrangerer i Norheimsund idrettshall laurdag 07. februar.

Hardanger BTK sitt førstelag spela fredag sesongens sjette kamp i 4. divisjon. Fjell 2 var motstandar i Hardanger Bordtennishall. Bortelaget vann 7-3.

HBTK stilte med Håvard Markhus, Kristian Sørheim og Liam Amir Jamal. Sigrane våre kom ved Håvard (2) og Liam. Ein kamp gjekk til femte sett og den vann Liam.

Dermed har førstelaget sikra seg fire av tolv moglege poeng etter seks spelte kampar.

HBTK ligg på fjerdeplass på tabellen etter fredagens kamp. Seks lag er med i avdelinga. Terminliste, resultat, tabell og oversikt over årets lagspelar finn du her. Tabellen er feil.

Neste kamp er ein heimekamp mot Laksevåg 4. Den vert spela i Hardanger Bordtennishall måndag 02. februar.

Fredag 16. januar er det heimekamp i 4. divisjon i Hardanger Bordtennishall. Hardanger BTK sitt førstelag møter Fjell 2 kl. 18.30.

Vel møtt til dei som vil koma for å sjå på kampen! Det vil også vera plass til å spela samstundes dersom nokon ynskjer det. Open hall går som normalt denne dagen.

Me i Hardanger Bordtennisklubb ynskjer alle medlemer og andre bordtennisvener eit godt nytt år!!

Treningane og open hall startar opp att til vanlege tider etter nyttår. Første dag vert sundag 04. januar. Då er det Vaffelsundag med sal av kaffi og vafler – slik det er første sundagen kvar månad. Det vert også – som alltid – mogleg å kjøpa brus og sjokolade. Arrangementet er frå kl. 17.30-19.00. Alle er vel møtt, men barn må koma i fylgje med vaksne eller etter avtale.

Laurdag 07. februar arrangerer Hardanger BTK Norheimsund Open i Norheimsund Idrettshall.

I dette stemnet er det mogleg å delta i tre klassar, men sidan me skal arrangera turneringa må me begrensa antal klassar ein del av oss deltek i. For HBTK-medlemer kostar det mellom 50 og 105 kroner å delta i dei ulike klassane. Stemnet har klassar for alle aldersgrupper. Det er dobbelklassar og eigen rekruttklasse. Me arrangerer også Golden Girls og Golden Boys, som er klassar for spelarar som ikkje er aktive i konkurransar. Invitasjonen finn du lenger nede på sida.

Påmelding skjer til Håvard (91535549, havard@hbtk.no) seinast 29. januar.

NB: Alle som er fødd i 2013 eller tidlegare må ha betalt lisens til NBTF. Gjeld ikkje Golden Girls, Golden Boys og rekruttklassen.

Hardanger BTK inviterer til ei ny utgåve av den tradisjonsrike turneringa Norheimsund Open laurdag 07. februar. Invitasjonen finn du her.

Informasjon til Hardanger BTK sine medlemer om turneringa vert lagt ut i ei eiga sak seinare.

Hardanger BTK har no teke juleferie. Det vil likevel verta mogleg å spela også i ferien. Sjå info om dette i saka under.

Me i Hardanger BTK ynskjer alle medlemer og andre bordtennisvener ei god jul!

Klubben har no teke juleferie. Open hall for pensjonistar og andre kl. 11.00-12.30 måndag 22. desember vil likevel gå som normalt. Alle er velkomne, men barn må koma i fylgje med vaksne eller etter avtale.

Dei andre faste tidene utgår i ferien. Det vil likevel verta mogleg å spela også i ferien. I den interne facebookgruppa vil me leggja ut info om når nokon av oss vil vera i hallen etter kvart som dette vert bestemt. Også då er alle velkomne, men barn må koma i fylgje med vaksne eller etter avtale.

Hardanger BTK sine juleavslutningar onsdag og torsdag vart svært vellukka! Det var avslutning for alle som ville på kveldstid onsdag og for føremiddagsgruppa på føremiddagen torsdag. Til saman var 25 personar til stades i hallen. Dei frammøtte kosa seg med kaker, snacks, twist, mandariner, kaffi og brus. Det var god stemning, og dei frammøte var svært nøgde med arrangementa!

Klubben har no teke juleferie, noko som betyr at det er pause i dei vanlege treningane og open hall. Det vil likevel verta mogleg å spela også i ferien. Info om dette kjem seinare.

Hardanger BTK stilte laurdag med fire deltakarar i ei rankingturnering i Alvøen idrettshall i Bergen. Best gjekk det med Murad Basem Farah. Han vann samtlege seks kampar og gjekk heilt til topps i rankingklasse 2! Dermed sikra han seg også førstepremien på 500 kroner. Jeannette Huttenlocher vart nummer sju i den same klassen. Ho tapte 3-2 mot spelaren som vart nummer tre.

I rankingklasse 1 vart Liam Amir Jamal nummer ti og Mohamad Basem Farah nummer elleve. Sistnemde tapte 3-2 mot spelaren som vart nummer fire i klassen.