Hardanger BTK sine to lag i 5. divisjon spela laurdag to kampar på heimebane i Hardanger Bordtennishall. Bergen PIL 4 og Heros 4 var motstandarar. Etter kampane er det klart at HBTK 3 vert serievinnar i 5. divisjon og rykkjer opp!
Begge laga våre stilte med fire spelarar som bytta på å spela. HBTK 3 stilte med Gustav Korshavn Vikesdal, Kaleb Mong, Felix van der Leest og Aodne Valland. Laget vann først 7-3 mot Heros 4. Sigrane kom ved Gustav (3), Aodne (2), Felix og dobbelparet Felix/Kaleb. To av kampane vann me i avgjerande sett. Deretter vann laget 8-2 mot Bergen PIL. Bortelaget stilte med berre to spelarar. Dermed vann me tre sigrar på walkover. Dei andre sigrane kom ved Kaleb (2), Gustav, Felix og Aodne.
HBTK 2 stilte med Liam Amir Jamal, Kristoffer Fonnaland, Lars Henrik Mo og spelande lagleiar Jeannette Huttenlocher. Laget vann først 7-3 mot Bergen PIL 4. I tillegg til tre walkover kom sigrane ved Liam (2), Jeannette og dobbelparet Lars Henrik/Kristoffer. To av kampane vann me i femte og avgjerande sett. Seinare på dagen tapte HBTK 2 knepent 6-4 mot Heros 4. Sigrane kom ved Lars Henrik (2), Kristoffer og dobbelparet Liam/Lars Henrik. I denne lagkampen vann me to kampar i avgjerande sett, medan Heros vann tre kampar på same vis. Poeng var med andre ord innan rekkevidde i denne lagkampen.
Elles så vart det ein del overraskande resultat i enkeltkampar i hallen i dag – for spelarar på alle laga. Mest stabil av alle i serien er uansett Gustav – som leiar kåringa av årets lagspelar med klar margin!
HBTK 3 har vunne samtlege sju seriekampar og er klar serieleiar etter helgas kampar! Ingen andre kan ta laget igjen! HBTK 2 ligg på tredjeplass blant dei fem laga. Terminliste, resultat, tabell og oversikt over årets lagspelar finn du her.
Me er veldig godt nøgde med poengfangsten i dag!| Gjennomføringa av serierunden gjekk også veldig bra, og sidan Hardanger BTK var 37 år fredag var det gratis frukt og twist til alle!
Laga våre møter Laksevåg 5 i sesongens siste kampar i Bergen laurdag 09. mars.
