Sesongmelding 2024-2025

Her kjem sesongmelding for sesongen 2024-2025. Ta kontakt med Håvard (91535549, havard@hbtk.no) dersom du oppdagar feil eller manglar i sesongmeldinga.

Sesongmelding Hardanger Bordtennisklubb sesongen 2024-2025           08.08.2025

Innleiing

Her kjem sesongmelding for sesongen 2024-2025. HBTK lagar kvart år ei kortfatta årsmelding og ei meir omfattande sesongmelding. Desse utfyller kvarandre.

Årsmeldinga vert godkjend på årsmøtet, medan sesongmeldinga vert godkjend av styret. Begge vert lagt ut på hbtk.no.

Organisasjon

Økonomisk leiar: Erlend Skeie Langeland

Sportsleg leiar: Håvard Markhus

Dugnadsansvarlege:

Jeannette Huttenlocher, Bente Maubach

Sponsoransvarlege: Erlend Skeie Langeland, Håvard Markhus

Trenarar: Håvard Markhus, Jan Visser

Ansvarlege for open hall: Bente Maubach, Lars Henrik Mo, Håvard Markhus, Jan Visser, Jeannette Huttenlocher, Aodne Valland, Jan Frank Bøe

Lagleiarar: Håvard Markhus (HBTK 1), Jeannette Huttenlocher (HBTK 2)

Medlemsansvarleg: Håvard Markhus

Påmeldingsansvarleg: Håvard Markhus

Materialforvaltar (innkjøp): Håvard Markhus

Materialforvaltar (reparasjonar): Lars Henrik Mo, Vidar Sangolt, Jan Visser, Bente Maubach

Politiattestar: Ivo Beijersbergen

Nettredaktør: Håvard Markhus

Veterankontakt: Jeannette Huttenlocher

Nokre verv fylgjer perioden mellom årsmøta. Oversikt over desse står i årsmeldingane.

Medlemstal, rekruttering, treningar

Klubben hadde 72 registrerte medlemer pr. 31.12.2024. Klubben har hatt eige treningslokale i Hardanger Bordtennishall også denne sesongen. Me har fleire aktive medlemer og høgare aktivitetsnivå enn før me fekk tilgang til eige treningslokale. Rekrutteringa av yngre medlemer burde ha vore betre. Me har framleis mange aktive medlemer i ulike aldersgrupper og av begge kjønn! Klubben har hatt trening eller open hall i Hardanger Bordtennishall seks dagar i veka. Me har også hatt tilbod til våre medlemer i alle feriar.

Kvam herad har lånt utstyret vårt i idrettshallen til open hall. Me har hatt vitjing av idrettsskulen til Kvam LSK. Klubben har delteke på Fritidsmessa til Kvam herad og torgdagen i Norheimsund.

Seriespel

Hardanger BTK stilte med to lag i seriespelet sesongen 2024-2025. Førstelaget enda på fjerdeplass i 4. divisjon medan andrelaget vart nummer tre i 5. divisjon.  

På førstelaget spela Håvard Markhus, Aodne Valland, Lars Henrik Mo, Torstein Valland, Vegard Markhus, Jeannette Huttenlocher, Liam Amir Jamal, Mohamad Basem Farah og Gustav Korshavn Vikesdal.

På andrelaget spela Felix van der Leest, Torstein Valland, Mohamad Basem Farah, Murad Basem Farah, Liam Amir Jamal, Jeannette Huttenlocher, Vegard Markhus og Obaida Taha.

Håvard var lagleiar for førstelaget og Jeannette for andrelaget.

Håvard vart årets lagspelar i 4. divisjon. I 5. divisjon vart Liam nummer fem.

Deltaking i turneringar i Noreg

Klubben har denne sesongen hatt deltakarar med i NM for yngre og veteran-NM. I tillegg har me delteke i eitt Norges Cup-stemne og diverse lokale stemne.

Resultat

Spelarane våre har oppnådd mange flotte resultat i lokale turneringar!  I nasjonale turneringar stod Iselinn Stuve for den beste prestasjonen då ho kom på tredjeplass i damer dobbel 35 i veteran-NM saman med makker Marthe Nilsen frå B-72. I NM for yngre sikra Liam Amir Jamal seg ein flott niandeplass i gutar dobbel saman med Jone Haugland frå Stord BTK.

Klubbmeistrar

Klubbmeistrar 2024 vart Håvard Markhus (herrar/damer open), Berit Fonneland (Golden Girls), Bjarte Døssland (Golden Boys), Liam Amir Jamal (gutar/jenter 15) og Felix van der Leest/Jeannette Huttenlocher (herrar/damer dobbel).

Deltaking i utlandet

Sommaren 2025 deltok fem spelarar og to lagleiarar frå klubben i turneringa Lekstorp Sommarpool i Sverige. Turen var svært vellukka!

Forbundsting, regionsting og valde representantar

Håvard Markhus representerte klubben på forbundstinget i mai. Jeannette Huttenlocher representerte klubben på regionstinget i juni.  Jeannette vart vald som styremedlem i region vest for to år i fjor, og var såleis ikkje på val i år. Ho fortset dermed som styremedlem i regionen.

Eigne arrangement

Klubben har arrangert Norheimsund Open og nokre mindre arrangement.

Sponsorar og støtte

Kvam Auto, GBS og Kvam Kraftverk  har vore generalsponsorar. Thon Hotel Sandven har vore hovudsponsor. Me har også hatt fleire mindre sponsoravtalar. Me har fått støtte frå Sparebanken Vest/Sparebanken Norge og Elsa og Svein Iversens legat.

Media

I løpet av sesongen har klubben hatt god dekning i Hordaland Folkeblad. 

Innkjøp av utstyr og drakter

Me har i løpet av sesongen kjøpt nye racketar samt diverse utstyr til hallen – blant anna bålpanne og spinningsykkel. Me har framleis ein svært god utstyrspark! Sommaren 2025 kjøper me inn nye drakter.

Treningsforhold og hall

Klubben inngjekk leigekontrakt på den tidlegare yrkesskulen i Steinsdalen sommaren 2022. Der leiger me vårt eige treningslokale i gymsalen. Me har no nytta dette lokalet i tre sesongar, og i løpet av sommaren forlenga me avtalen om leige fram til sommaren 2026.  Klubben har veldig gode treningsforhold i lokalet – som har fått namnet Hardanger Bordtennishall.

Dugnad

Klubbens største dugnadsløft var Norheimsund Open. I tillegg har me gjennomført dugnad i samband med nokre mindre arrangement. Elles vert det utført mykje dugnad i samband med den ordinære drifta av klubb og hall.

Kurs

Åtte klubbmedlemer deltok på klubbtrenarkurs i regi av NBTF i Hardanger Bordtennishall.

Oppsummering

Klubben har gjennomført ein sesong der me har hatt mange aktive medlemer og høgt aktivitetsnivå. Me har fleire aktive medlemer og høgare aktivitetsnivå enn før me fekk tilgang til eige treningslokale i Hardanger Bordtennishall. Me har stor glede og nytte av å ha eige treningslokale. Me har også oppnådd gode resultat! Klubben har mange medlemer som tek på seg oppgåver, og drifta av klubben går godt!

Me kan vera veldig godt nøgde med sesongen! Blant høgdepunkta var då me arrangerte og stilte med 18 deltakarar i Norheimsund Open og då sju klubbmedlemer var på tur til Sverige.

Sjå elles årsmeldingane, som vert lagt ut på hbtk.no etter årsmøte kvart år.

Styret