Laurdag arrangerte Hardanger BTK årets utgåve av den tradisjonsrike turneringa Norheimsund Open, som også var årets regionsmeisterskap i region vest. HBTK stilte med femten deltakarar i turneringa, og klubbens medlemer oppnådde mange sterke plasseringar!
Jack Feng gjorde det skarpt i Norheimsund Open!
Simon Feng i sving mot Thomas Låte frå Stord BTK.
Jack Feng gjekk heilt til topps i herrar C! Han fekk også ein flott andreplass i gutar 15, og hadde dermed ein veldig god dag i Norheimsund idrettshall. Broren Simon hadde også ein veldig god dag. Han tok ein flott tredjeplass i gutar 15 og vart nummer fem i herrar C. Simon imponerte særleg med å slå langt høgare rangerte Benjamin Otto Hatlebakk, etter å ha lege under 10-6 i femte og avgjerande sett.
Aleksander Norheim sikra seg ein flott andreplass i herrar D!
Aleksander Norheim deltok i sitt første stemne for sesongen, og sikra seg ein flott andreplass i herrar D. I nybyrjarklassen stilte HBTK med mange deltakarar. Best gjekk det med Johannnes Furu Skarpeid, som vart nummer tre. David Myhre Brakestad vart nummer ni, og var svært nære å gå til kvartfinalen.
HBTK-trenar og Stord-spelar Roger Andersson vart ein soleklar vinnar i herrar open, etter å ha slege paralympisk meister Tommy Urhaug i finalen. Dette var første gongen Roger spela turnering i Norheimsund etter at han flytta til Kvam.
Rundt sytti spelarar frå ti klubbar deltok i årets utgåve av Norheimsund Open. Det vart konkurrert i ti ulike klassar og på atten bord. Turneringa vart opna med flott song av Olav Skeie Lid, som framførte Norheimsund-songen. HBTK spanderte gratis brus og kaffi på alle damer og jenter i høve Kvinnedagen.
Slik såg det ut i Norheimsund idrettshall laurdag.
Hardanger BTK takkar turneringsleiar Anders Hovden, som hadde ansvaret for gjennomføringa av arrangementet i sekreteriatet! Me takkar vidare klubbens medlemer for god hjelp før og under stemnet! Sist, men ikkje minst, takkar me lokalt næringsliv for sponsorstøtte og mange flotte gåvepremiar!
Hardanger BTK er veldig godt nøgde med spelarane våre sine resultat i stemnet! Me er også godt nøgde med gjennomføringa av turneringa, der me heile tida låg framfor tidsskjema. I kiosken var salet godt, og me tjener nok ein god del kroner på denne turneringa.
Neste turnering er NM for yngre i Bodø 21.-23. mars. Der deltek Jack Feng, Simon Feng og Ole Marcus Løkhammer. Før den tid skal det spelast fleire seriekampar.
Sjå elles resultatlista for Norheimsund Open, som ligg i ei eiga sak.
