Årsmøtet i Hardanger BTK 17. juni kunne slå fast at 2019 vart eit vellukka år for klubben!
Her kjem årsmeldinga som vart godkjend på årsmøtet:
Årsmelding Hardanger Bordtennisklubb 2019
Innleiing
Det har blitt utfordrande å skriva årsmelding etter at Noregs idrettsforbund vedtok at årsmøte skal gjennomførast seinast i mars. Det har gjort at ein har måtta skriva om to halve sesongar. Klubben vil difor gå over til å laga ei kort årsmelding som dekkjer perioden mellom dei to årsmøta. Denne vil verta lagt fram på årsmøtet. I tillegg vil ein laga ei sesongmelding som dekkjer sesongen. Denne vil verta godkjend av styret og lagt ut på heimesida til klubben etter kvar sesong.
Organisasjon
Styret har vore samansett slik:
Leiar: Jack Feng Vald til 2020
Nestleiar: Ivo Beijersbergen Vald til 2020
Styremedlemer: Jan Roger Andersson Vald til 2020
Iselinn Stuve Vald til 2020
Jeannette Huttenlocher Vald til 2020
Varamedlemer: Liselotte Takken Vald til 2020
Tony Låte Vald til 2020
Fylgjande personar vart vald til andre oppgåver på sist årsmøte:
Revisor: Thomas Sætre Vald til 2020
Valkomitè: Håvard Markhus, Roger Andersson og Simon Feng Vald til 2020
Fylgjande personar har hatt faste oppgåver sidan sist årsmøte:
Sportsleg utval:
Leiar: Håvard Markhus
Medlemer: Roger Andersson
Jack Feng
Dugnadsutval: Jeannette Huttenlocher
Iselinn Stuve
Rekneskapsførar: Anders Hovden
Sponsorarbeid: Jack Feng, Håvard Markhus og Vidar Sangolt
Medlemsansvarleg: Ivo Beijersbergen
Politiattestar: Ivo Beijersbergen
Nettside: Håvard Markhus, Jack Feng
Veterankontakt: Endre Furu
Fylgjande personar har hatt faste oppgåver sesongen 2019-2020:
Trenarar: Roger Andersson, Håvard Markhus, Liselotte Takken, Ivo Beijersbergen og Jan Visser
Lagleiarar: Jack Feng og Roger Andersson (HBTK 1), Håvard Markhus (HBTK 2)
Påmeldingsansvarleg: Roger Andersson
Materialforvaltar (innkjøp): Roger Andersson
Materialforvaltar (reparasjonar): Roger Andersson, Vidar Sangolt
Styrearbeid
Styret har gjennomført to styremøte og har i tillegg hatt kontakt via telefon og mail.
Medlemstal, rekruttering, treningar
Klubben har hatt over femti medlemer. Rekrutteringa har vore veldig god! Me har mange aktive medlemer – både born, ungdomar og vaksne og av begge kjønn! Hausten 2019 har det blitt fleire aktive ungdomar i klubben, noko som er svært gledeleg! Klubben hadde trening i Norheimsund idrettshall fem dagar i veka våren 2019. Hausten hadde me trening i idrettshallen fire dagar i veka og i Framnes Arena ein dag i veka.
Tilbod på vidaregåande skular
Jan Roger Andersson hadde bordtennis som toppidrett valfag på Kvam vidaregåande skule våren 2019. Ingen klubbmedlemer hadde bordtennis på vidaregåande skule hausten 2019.
Skulebesøk
Klubben har ikkje gjennomført bordtennisøkter med klassar på nokon skular denne perioden, men me har hatt enkel opplæring av lærar som gjennomførte økter med elevar på Framnes Kristne Vidaregåande Skule.
Farmerklubb og medlemer andre stader
Strand ULV IL BTG på Hatlestrand er farmerklubb av Hardanger BTK. Dette er vår første farmerklubb nokon gong. Klubben har hatt ikkje hatt noko aktivitet denne perioden.
Hardanger BTK har aktive medlemer i Bergen, Stord, Polen, Sverige og Slovenia i tillegg til i fleire bygder i Kvam.
Trenarar
Hovudtrenar har vore tidlegare kongepokalvinnar Roger Andersson. I tillegg har Håvard Markhus, Ivo Beijersbergen, Liselotte Takken og Jan Visser vore trenarar.
Seriespel (lag, plassering, spelarar, årets lagspelar, spelarar som jubilerer)
Hardanger BTK hadde to lag i seriesystemet sesongen 2018-2019. Førstelaget vann 1. divisjon og rykka opp til eliteserien! Andrelaget vart nummer tre i 4. divisjon. Roger Andersson vart årets lagspelar i 1. divisjon, medan Håvard Markhus vart nummer to i same kåring i 4. divisjon.
På førstelaget spela Roger Andersson, Thomas Låte, Jan Roger Andersson og Jack Feng. På andrelaget spela Endre Furu, Piotr Kostrzewski, Ivo Beijersbergen, Håvard Markhus, Erik Berge Saue og Johannes Furu Skarpeid.
I løpet av sesongen 2018-2019 passerte Thomas Låte og Jan Roger Andersson 25 A-lagskampar.
Sesongen 2019-2020 hadde me også to lag i seriesystemet. Resultata kjem i sesongmelding for sesongen 2019-2020.
Våren 2019 spela Roger og Jan Roger Andersson seriespel for Kyrkhults BTK i Sverige. Hausten 2019 spela Thomas Låte samt Roger og Jan Roger seriespel for Kyrkhults BTK.
Deltaking i turneringar i Noreg
Klubben har hatt deltakarar med i senior-NM, veteran-NM, NM for eldre junior, NM for junior, tre Norges Cup-stemne, Stiga Norges Cup-finale og diverse lokale stemne.
Resultat
Spelarane våre har oppnådd mange flotte resultat!
Jan Roger Andersson fekk ein imponerande og overraskande bronsemedalje i herrar singel i EM for døve i Bulgaria!
I NM for senior fekk Roger Andersson sølv i herrar elite. Han fekk også sølv saman med Rebecca Carlsen frå B-72 i mix dobbel.
I NM for veteranar vart Roger Andersson noregsmeister i herrar singel 40 og i herrar dobbel 35, der han spela med Raymond Bergaas frå Heros. Roger fekk sølv i mix dobbel 35 saman med Camilla Henriksen frå Langhus IL. Endre Furu var noregsmeister i herrar ståande singel 35, der han spela saman med Tommy Urhaug frå Stord BTK. Han fekk også bronse i herrar 35 funksjonshemma open.
I NM for junior vart Thomas Låte noregsmeister i mix junior dobbel, der han spela saman med Rikke Skåttet frå B-72.Thomas sikra seg i tillegg sølv både i herrar junior singel og i herrar junior dobbel, der han spela saman med Sigurd Sørheim frå Fornebu BTK.
I NM for eldre junior vart det bronse på Hardanger BTK i herrar eldre junior lag. På laget spela Thomas Låte, Jan Roger Andersson, Jack Feng og Simon Feng, medan Roger Andersson var lagleiar. Thomas og Jan Roger fekk også bronse i herrar eldre junior dobbel.
I Stiga Norgescupfinalen 2019 vart Roger Andersson nummer fire i herrar elite, medan Jan Roger Andersson vart nummer seks i herrar eldre junior.
Hausten 2019 hevda klubbmedlemer seg godt i Norges Cup-stemne. Resultata kjem i sesongmelding for sesongen 2019-2020.
Lagsmeistrar
Lagsmeistrar 2019 vart Roger Andersson (herrar open) og Håvard Markhus/Jannik Huttenlocher (herrar/damer dobbel).
Forbundssamlingar, landslagsoppdrag og deltaking i utlandet
Jan Roger Andersson har delteke på forbundssamling for senior og junior i Oslo.
Han representerte Noreg i EM for døve i Bulgaria.
Forbundsting, regionsting og valde representantar
Håvard Markhus og Roger Andersson representerte klubben og Jack Feng representerte regionen på regionstinget i mai 2019. Jack tok gjenval som styremedlem i Bordtennisregion Vest, medan Iselinn Stuve vart vald inn som ny styremedlem.
Jack deltok hausten 2019 på eit møte i regi av Norges Bordtennisforbund i Oslo, der ein diskuterte breidde og rekruttering.
Diverse (stipend, jubileum m.m.)
Roger Andersson vart kåra til Årets mannlege veteran 2019.
Eigne arrangement
Klubben har arrangert Norheimsund Open, heimekampar i eliteserien og 4. divisjon, halloweentrening, julegristurnering og juleavslutning. I tillegg hadde me ei treningssamling saman med det austerriske døvelandslaget i Norheimsund. I eliteserien gjennomførte me ein vellukka samlerunde i Framnes Arena med over hundre tilskodarar totalt.
Me arrangerte kretsmeisterskap i Bergen saman med Bergen HIL og me hjelpte til under NM for veteranar, som vart arrangert i Bergen av Sportsklubben Heros.
Sponsorar og støtte
Klubben har hatt hovudsponsoravtalar med Sparebanken Vest, Kvam Auto, Lingalaks og Thon Hotel Sandven. Me har også hatt fleire mindre sponsoravtalar.
Media
I løpet av perioden har klubben hatt god dekning i Hordaland Folkeblad. Avisa Sunnhordland har skrive litt om klubbens stordabuer.
Me laga også ein promofilm for eliteserien som var delt via facebook og heimesida til klubben.
Innkjøp av utstyr og drakter
Klubben har kjøpt inn nye racketar. Me har framleis ein svært god utstyrspark!
Treningsforhold og hall
Klubben har gode treningsforhold i Norheimsund idrettshall. Me har også trena i Framnes Arena ein dag i veka hausten 2019. Me har fire bord utplassert i Framnes Arena og eitt i festsalen på Kvam vidaregåande skule avdeling Øystese.
Me vurderer også fleire alternativ med tanke på bordtennishall.
Økonomi
Økonomisk gjekk klubben med eit underskot på kr 22 105,– i 2019. Me har pengar på konto og ein ryddig økonomi.
Dugnad
Klubbens medlemer har utført dugnadsarbeid i samband med Norheimsund Open, samlerunde i eliteserien, NM for veteranar og kretsmeisterskap.
Oppsummering
Me har mange medlemer som tek på seg oppgåver, og drifta av klubben går godt! Klubben kan vera veldig godt nøgd med 2019!
Styret
