Hardanger BTK stilte med sju spelarar i Lyderhornspretten, som vart arrangert i Olsvikhallen i Bergen laurdag. Våre deltakarar oppnådde fleire flotte plasseringar!
Aller best gjekk det med Gustav Korshavn Vikesdal. Han deltok i herrar f for første gong, og spela seg heilt fram til finalen. Både i kvarten og semien vann han 3-2 og med 11-9 i avgjerande sett. I finalen vart det 3-2-tap, men uansett vart det ein sterk andreplass på Gustav! Dermed sikra han seg også pengepremie for første gong, så no er han i gang med å tjena pengar på idretten.. I gutar 15 vart det ein flott femteplass på Gustav, etter eit knepent tap mot klassevinnaren i kvarten. Med sin nye defensive spelestil slo Gustav fleire langt høgare rangerte spelarar.
I gutar 11 vart det ein sterk andreplass på Kaleb Mong! I semien imponerte han med 3-0-siger mot spelaren som er rangert som nummer seks i landet i klassen.
Liam Amir Jamal sikra klubben sin tredje finaleplass! Han vart nummer to i den eldste nybyrjarklassen etter eit knepent finaletap. Sandar Lyssand vart nummer ni i herrar f, etter å ha kjempa seg vidare frå dødens pulje i klassen. Mohamad Bassem Farah vart nummer ni i gutar 15. Felix van der Leest og Kristoffer Fonnaland vann også kampar, men gjekk ikkje vidare frå puljespelet.
Etter turneringa bada HBTK-gjengen på Vannkanten, før klubben spanderte pizza og brus på alle på Peppes Pizza!
Under NM for yngre i vår tapte våre spelarar ei rekkje kampar i femte og avgjerande sett. Denne gongen klara spelarane våre å vinna ei rekkje slike kampar, noko som er svært gledeleg!
Me i Hardanger BTK er veldig godt nøgde med spel, resultat og innsats i turneringa og med ein vellukka og sosial dag i Bergen!
Neste turnering er Trondheim Open 30.september-01. oktober.
