Under «Treningstider» finn du no våre faste treningstider. Tidene gjeld frå og med veke 35. Same stad finn du også annan info om treningane våre. Under «Medlemsinfo» finn du mykje annan informasjon for deg som vil vera med i klubben vår!

Vel møtt på trening! Me håpar på godt oppmøte!

I veke 34 vert det trening til fylgjande tider:

Måndag: kl. 11.00-12.30 Open hall for pensjonistar og andre

Tysdag kl. 18.00-19.30 Trening for alle

Onsdag: kl. 18.00-19.30 Trening for alle

Torsdag: kl. 11.00-12.30 Open hall for pensjonistar og andre

                    kl. 14.30-16.00 Open hall for ungdomar

Me trenar i vårt nye treningslokale. Hardanger Bordtennishall finn du no på denne adressa: Vavollen 5, 5610 ØYSTESE.

Gå inn inngang ved møbelutsal, opp trapp til andre etasje og gjennom sengeavdeling. Ta kontakt om du treng tilgang til heis.

Dersom det vert folk i hallen til andre tider vil me leggja dette ut i den interne facebookgruppa. I så fall vil alle vera velkomne, men barn må koma i fylgje med vaksne eller etter avtale.

Ta kontakt med Håvard (91535549, havard@hbtk.no) dersom du vil bli medlem i den interne facebookgruppa. Ta også kontakt med Håvard dersom du ynskjer å verta informert om når det vert folk i hallen, dersom du vil trena til andre tider eller dersom du ynskjer å låna hallen.

Dei faste treningstidene kjem seinare.

Me håpar på godt oppmøte! Vel møtt på trening!

Laksevåg BTK arrangerte bordtennisleir i Alvøen idrettshall i Bergen 29.-juli-02. august. Liam Amir Jamal frå Hardanger BTK deltok på leiren. Der fekk han mykje god trening under leiing av den svenske trenaren Tobias Bergman. I tillegg hadde han kjekke dagar sosialt saman med spelarar frå andre klubbar. Etter deltakinga på leiren er Liam no godt førebudd til den nye sesongen!

Etter ei vekes pause startar Hardanger BTK opp att med open hall for pensjonistar og andre kl. 11.00-12.30 måndagar og torsdagar. Alle er velkomne, men barn må koma i fylgje med vaksne eller etter avtale.

Første økt vert måndag 03. august. Dette vert også første økt i vårt nye treningslokale. Hardanger Bordtennishall finn du no på denne adressa: Vavollen 5, 5610 ØYSTESE.

Gå inn inngang ved møbelutsal, opp trapp til andre etasje og gjennom sengeavdeling. Ta kontakt om du treng tilgang til heis.

Føremiddagsøktene er dei einaste fastsette tidene i veke 32 og 33. Dersom det vert folk i hallen til andre tider vil me leggja dette ut i den interne facebookgruppa. Alle er velkomne når det er folk i hallen, men barn må koma i fylgje med vaksne eller etter avtale.

Ta kontakt med Håvard (91535549, havard@hbtk.no) dersom du vil bli medlem i den interne facebookgruppa. Ta også kontakt med Håvard dersom du ynskjer å verta informert om når det vert folk i hallen, dersom du vil trena til andre tider eller dersom du ynskjer å låna hallen.

Info om når dei faste treningane og dei andre dagane med open hall startar opp att kjem når dette er klart.

Mange har vore på trening i løpet av sommaren, og me håpar på godt oppmøte også i veke 32 og 33!

Vel møtt!

Her kjem sesongmelding for sesongen 2025-2026. Ta kontakt med Håvard (91535549, havard@hbtk.no) dersom du oppdagar feil eller manglar i sesongmeldinga.

Laurdag 29. august arrangerer Stord BTK årets kretsmeisterskap og regionsmeisterskap for veteranar i Stord Bordtennishall på Stord.

I dette stemnet er det mogleg å delta i fleire klassar. Det er både singel, dobbel og lagklassar. Det kostar 250 kroner å delta i turneringa.

Påmelding skjer til Håvard (91535549, havard@hbtk.no) seinast 20. august.

NB: Ein må ha betalt lisens til NBTF for å kunna delta.

.

Etter fire år i Steinsdalen flyttar Hardanger BTK no til Torpe Møbelfabrikk i Øystese. Me har i første omgang inngått ein eitt-årig leigeavtale frå 1. august med Torpe Eigedom AS, men begge partar håpar på eit langt og godt samarbeid.

I Steinsdalen har me hatt gode år i gymsalen på tidlegare Norheimsund yrkesskule. Klubben har hatt flott auke i både antal aktive medlemer og aktivitet medan me har vore der. Me takkar utleigar Dalatunvegen AS for godt samarbeid!

Hardanger BTK har motteke 6000,- i støtte frå Elsa og Svein Iversens legat! Støtta skal gå til prosjektet «Bordtennis for alle!».

Også dei siste to åra har me fått støtte frå dette legatet. Me takkar Elsa og Svein Iversens legat for at dei støttar oss også i år!

Helga 05.-06. september arrangerer Laksevåg BTK årets utgåve av Lyderhornspretten i Alvøen idrettshall i Bergen.

Laurdagen er det mogleg å delta i to klassar, og det kostar mellom 160 og 210 kroner å delta i dei ulike klassane. Det er klassar for alle aldersgrupper.

Sundagen kan ein delta i ein klasse og det kostar mellom 140 og 230 kroner å delta i dei ulike klassane. Denne dagen vert det arrangert rankingklassar og rekruttklasse.

Påmelding skjer til Håvard (91535549, havard@hbtk.no) seinast 31. august.

Det er fint om nokon melder seg som sjåførar.

Me gjer merksam på at Torgdagen i Norheimsund – der klubben truleg skal ha stand – vert arrangert laurdag 05. september.

NB: Alle som er fødd i 2014 eller tidlegare må ha betalt lisens til NBTF. Gjeld ikkje rekruttklassen.

Hardanger BTK fekk måndag eit kjekt besøk av to hyggjelege bordtennisspelarar – Jens og René – som var på bubilferie i Noreg. Etter nesten to veker på Vestlandet hadde dei funne ut av det var vanskeleg å finna utebordtennisbord under tak og utan vind.. Difor tok dei kontakt med oss. Dei vart med både på open hall på dagtid og ei ekstra treningsøkt på ettermiddagen. Det vart lange økter, og me var minst seks timar i hallen denne dagen. Jens var trenar i klubben deira; SC Wentorf nær Hamburg. Begge kom med gode råd og tankar om bordtennis.

Me fekk også beskjed om at me var hjarteleg velkomne på besøk til klubben deira! Sjølv takkar me Jens og René for besøket, og ynskjer dei velkomne tilbake ein annan gong!