I veke 9 er det vinterferie.

Open hall for alle vil gå som normalt kl. 17.30-19.00 både sundag 23. februar og sundag 02. mars. Open hall for pensjonistar og andre kl. 11.00-12.30 måndag 24. februar og torsdag 27. februar går også som normalt. Alle er velkomne desse dagane, men barn må koma i fylgje med vaksne eller etter avtale.

Under open hall sundag 02. mars er det Vaffelsundag med sal av kaffi og vafler – slik det er første sundagen kvar månad. Det vert også – som alltid – mogleg å kjøpa brus og sjokolade.

Dei andre faste tidene utgår i ferien, men truleg vil det vera folk i hallen for å spela også til andre tider. I så fall vil det verta lagt ut info om dette i den interne facebookgruppa etter kvart som dette vert bestemt. Også då er alle velkomne, men barn må koma i fylgje med vaksne eller etter avtale.

Ta kontakt med Håvard (91535549, havard@hbtk.no) dersom du vil bli medlem i den interne facebookgruppa. Ta kontakt med han dersom du ynskjer å verta informert om når det er folk i hallen eller dersom du ynskjer å låna hallen i ferien.

Hardanger BTK ynskjer alle medlemer og andre bordtennisvener ein god vinterferie!

Hardanger BTK har motteke 17 500,- frå Sparebankstiftinga Sparebanken Vest sitt Eldsjelfond! Støtta skal gå til innkjøp av utstyr.

Sparebanken Vest har vore vår viktigaste støttespelar og samarbeidspartnar i mange år, og me gler oss over at dei framleis vil vera dette!

Me takkar Sparebanken Vest for at dei nok ein gong støttar oss, og oppmodar alle om å bruka banken!

Det vert årsmøte i Hardanger Bordtennisklubb i Hardanger Bordtennishall måndag 17. mars kl. 1900. Vanlege årsmøtesaker. Forslag til saker kan sendast til post@hbtk.no seinast 03. mars. Vel møtt!

Hardanger BTK stilte med heile 18 deltakarar og oppnådde mange flotte resultat i årets utgåve av den tradisjonsrike turneringa Norheimsund Open, som me arrangerte i Norheimsund idrettshall laurdag. Blant deltakarane våre var alderskilnaden 83 år (!) frå den eldste til den yngste!

Her kjem resultatliste for Norheimsund Open 2025, som vart arrangert i Norheimsund idrettshall laurdag. Kun dei beste spelarane i klassane er med på listene.

Resultatliste Norheimsund Open 2025

Me takkar alle for eit kjekt stemne, og ynskjer velkomen tilbake til Norheimsund Open 2026!

88 deltakarar frå ti klubbar er påmelde til årets utgåve av den tradisjonsrike turneringa Norheimsund Open.

Sportsklubben Heros er største klubb med 21 påmeldte, medan Hardanger BTK har 20 påmeldte!

Turneringa vert arrangert i Norheimsund idrettshall laurdag 15. februar. Me vil også ha eit par bord i amfisalen på Norheimsund skule – som ligg i det same bygget.

Spelarar frå Hardanger BTK, Laksevåg BTK, Fjell, Sportsklubben Heros, Bergen PIL, Stord BTK, Haugesund BTK, Rosseland BTK, Stavanger BTK og NHHI deltek.

Blant deltakarane er tidlegare kongepokalvinnar Roger Andersson frå Stord BTK.

Dersom fleire ynskjer å melda seg på er det mogleg fram til ein halvtime før klassestart – enten til Håvard (91535549, havard@hbtk.no) eller i sekreteriatet i hallen laurdag.

Her ser du deltakarlistene – pr klubb og pr klasse med seeding:

Deltakarliste pr klubb

Deltakarliste pr klasse med seeding

Me ynskjer alle vel møtt til Norheimsund Open 2025!

Laurdag arrangerer Hardanger BTK årets utgåve av Norheimsund Open i Norheimsund idrettshall. Hardanger BTK har meldt på heile 20 spelarar! Me tek i mot påmelding fram til ein halvtime før klassestart dersom fleire ynskjer å vera med. Ta i så fall kontakt med Håvard (91535549, havard@hbtk.no) eller med sekreteriatet i hallen.

Det vert ikkje open hall sundag 16. februar grunna avviklinga av Norheimsund Open dagen før.

Her kjem tidsskjema for Norheimsund Open 2025, som vert arrangert i Norheimsund idrettshall laurdag 15. februar. Dersom mogleg vil me prøva å starta nokre av klassane som er sett opp kl. 11.30, 12.30 og 15.30 tidlegare. Møt seinast ein halvtime før oppsett tidspunkt.

Laurdag 29. mars arrangerer Laksevåg BTK Laksevågkruset i Olsvikhallen i Bergen.

I dette stemnet er det mogleg å delta i to klassar og det kostar mellom 100 og 200 kroner å delta i dei ulike klassane. Stemnet har klassar for alle aldersgrupper, og det er eigen rekruttklasse. Påmelding skjer til Håvard (91535549, havard@hbtk.no) seinast 13. mars.

Sundag 30. mars arrangerer Laksevåg BTK årets regionsmeisterskap i Olsvikhallen i Bergen.

I dette stemnet er det mogleg å delta i tre klassar og det kostar mellom 100 og 200 kroner å delta i dei ulike klassane. Stemnet har klassar for alle aldersgrupper. Det er også dobbelklassar, men ikkje rekruttklasse. Påmelding skjer til Håvard (91535549, havard@hbtk.no) seinast 13. mars.

Det er fint om nokon melder seg som sjåførar.

NB: Alle som er fødd i 2012 eller tidlegare må ha betalt lisens til NBTF. Gjeld ikkje rekruttklasse.