NM-statistikk for Hardanger BTK finn du under «NM-statistikk» i menyen øvst på sida. Statistikken er no oppdatert slik at alle medaljar og plasseringar til og med sesongen 2023-2024 er med. Stiga 11-ern er også med i oversikta, men her er berre plasseringar frå og med sesongen 2020-2021 med.

I statistikken finn du oversikt over alle NM-medaljar som medlemer av klubben har teke. I tillegg er ein del femteplassar med i statistikken. Medaljar og plasseringar frå tida då klubben heitte Norheimsund Bordtennis er også med.

Under Statistikk A-lag i menyen øvst på sida finn du ei oversikt over alle som har spela A-lagskampar for Hardanger Bordtennisklubb sidan oppstarten. Det vil seia at kampane som vart spela medan klubben heitte Norheimsund Bordtennis også er med.

Statistikken er no oppdatert slik at alle kampar til og med sesongen 2023-2024 er med.

Styreleiar Håvard Markhus toppar med 212 A-lagskampar, medan nestleiar Jack Feng er på andreplass med 124 A-lagskampar.

Jack Feng har meldt overgang til Bergen PIL. Jack har spela for Hardanger BTK heilt sidan han byrja å spela bordtennis, og han er den spelaren klubben har oppfostra som har nådd lengst. Jack har blant anna fleire NM-medaljar og mange kampar i eliteserien. Han har 124 A-lagskampar for klubben, og var med på reisa frå 3. divisjon til eliteserien med førstelaget. Han har også stått for andre sterke prestasjonar som spelar.

Jack har også vore sentral i klubben på andre måtar. Han vart leiar i klubben på 18-årsdagen, og har vore med i styret samanhengande sidan då. No er han nestleiar. Jack er også utdanna forbundsdommar, og han er ein av regionens beste turneringsleiarar. Han har også hatt verv i regionsstyret i mange år.

Det siste året har Jack spela seriespel på utlån til Bergen PIL i 2. divisjon. No melder han overgang. Nok ein gong mister Hardanger BTK ein av våre beste spelarar, men me gler oss over at Jack framleis er med i klubben vår som nestleiar.

Hardanger BTK takkar Jack for alt han har gjort for klubben vår så langt! Me ynskjer han lukke til i Bergen PIL, og velkomen tilbake ved eit seinare høve!

Hardanger BTK har no teke sommarferie.

Open hall for pensjonistar og andre kl. 11.00-12.30 på torsdagar fortset gjennom sommaren. Alle er velkomne, men barn må koma i fylgje med vaksne eller etter avtale.

Dei andre faste tidene utgår i ferien, men ein del av oss vil møtast for å spela også til andre tider. I den interne facebookgruppa vil me leggja ut info om når nokon av oss vil vera i hallen etter kvart som dette vert bestemt. Alle er velkomne når det er folk i hallen, men barn må koma i fylgje med vaksne eller etter avtale.

Ta kontakt med Håvard (91535549, havard@hbtk.no) dersom du vil bli medlem i den interne facebookgruppa. Ta også kontakt med Håvard dersom du ynskjer å verta informert om når det vert folk i hallen eller dersom du ynskjer å låna hallen i ferien.

Me minner elles om at det er utebord i parkar og ved skular i Norheimsund og Øystese.

Info om når dei faste treningane og dei andre dagane med open hall startar opp att kjem når dette er klart. Elles så vil det dukka opp diverse nyhende både på hbtk.no, på den opne facebooksida og i den interne facebookgruppa i løpet av sommaren.

Hardanger BTK ynskjer alle medlemer og andre bordtennisvener ein god sommar!!

Jeannette Huttenlocher vart vald som styremedlem i Region Vest under regionstinget i Bergen sundag. Dermed er Hardanger BTK igjen representert i regionsstyret – etter at me ikkje har vore det det siste året. Otto Hatlebakk frå Laksevåg BTK er ny regionsleiar. Jeannette representerte klubben på regionstinget saman med Aodne Valland. Begge deltok via Teams.

Hardanger BTK sine to forslag om endringar i regelverk for seriespel i regi av regionen vart vedteke. Ingen kampar i lokalt seriespel kan utsetjast meir enn to veker, og lokalt seriespel skal vera avslutta seinast 15. april.

Me ynskjer styret lukke til med arbeidet i regionen!

Hardanger BTK stilte med tre lag i seriespelet sesongen 2023-2024. Førstelaget enda på fjerdeplass i 4. divisjon, andrelaget enda på fjerdeplass i 5. divisjon og tredjelaget gjekk til til topps i 5. divisjon. Her kjem ei oppsummering av sesongen.

Hardanger BTK si sommaravslutning tysdag vart svært vellukka! Rundt tredve personar var til stades i hallen. Dei frammøtte kosa seg med pizza, vårrullar, is, brus, frukt, sjokolade og snacks. Mange slo også nokre slag bordtennis. Det var god stemning, og dei frammøte var svært nøgde med arrangementet!

NB. Sjølv om det var sommaravslutning tysdag, vert det treningar og open hall til vanlege tider også framover. Info om når me tek sommarferie – og om moglegheita til å spela også i sommar – kjem seinare.

Hardanger BTK gjennomførte i helga ein svært vellukka klubbtur til NM for yngre og Stiga 11-ern i Skien! Me stilte med sju deltakarar under arrangementa, som vart gjennomført i Skien Fritidspark fredag til sundag. I tillegg stilte me med ein heiagjeng på fem – beståande av foreldre, lagleiarar og klubbens yngste medlem.

Denne helga er det klart for NM for yngre og Stiga 11-ern i Skien Fritidspark i Skien!

Arrangementet startar med lagklassar fredag og fortset med andre klassar laurdag og sundag. Trekning, resultatservice og tidsskjema finn du her.

Hardanger BTK stiller med sju spelarar. I tillegg stiller me med ein heiahjeng på fem – beståande av foreldre, lagleiarar og klubbens yngste medlem.

Me ynskjer spelarar og støtteapparat lukke til!

NB. Hardanger BTK vil leggja ut oppdateringar på vår facebookside i løpet av helga. På nettsida vil det truleg ikkje verta lagt ut reportasje før måndagskveld.

Tysdag 04. juni vert det sommaravslutning for alle som vil ved Hardanger Bordtennishall kl. 18.00. Påmelding skjer til Bente Maubach (95004190, bente@hbtk.no) seinast 31. mai. Gje også beskjed om eventuelle allergiar.

Det vert pizza og brus m.m. Klubben kjøper inn.

Vaksne betalar 100,- og dei under 18 år 50,-. Betaling vert via Vipps, og de får beskjed om Vippsnummer ved oppmøte.

Det er fint om alle kan ta med bestikk, fat og kopp sjølv.

NB. Sjølv om det er sommaravslutning denne dagen vil me fortsetja med både treningar og open hall til same tider som før også etter avslutninga.